Լուրեր

Առաջիկայում Շիրակի մարզի բերքն ու բարիքը, Հայաստանում արտադրվող ալոհոլային եւ ոչ ալկոհոլային խմիչքները, հանքային ջրերը, հյութերն ու չրերը կհայտնվեն Չինաստանի Խայնան կղզում:  Այս մասին 3 ամիս առաջ ծավալված խոսակցություններն արդեն ամրագրված են հայ-չինական համաձայնագրով:

 

Գյումրի այցելած «Հայ-չինական հարաբերությունների տարածաշրջանային զարգացման հիմնադրամի» գործադիր տնօրեն Վլադիմիր Սիմոնյանցը լրագրողների հետ զրույցում ասաց, որ Հայաստանի հետ ապրանքաշրջանառության մասին համաձայնագիր ունեն: Հայաստանից Խայնան հասած ապրանքները կներկայացվեն այնտեղ բացվող Առեւտրի տանը: Ըստ Սիմոնյանցի, Խայնան կղին ընտրել են մեկ պարզ պատճառով: Տարեկան այնտեղ այցելում է 70 մլն զբոսաշրջիկ, հիմնական մասը չինացիներ: Կղզում իրենց հանգիստն անցկացնողները վճարունակ մարդիկ են, ովքեր կարողանում են իրենց նման շռայլություն թույլ տալ:

 

 Այդ զբոսաշրջիկների մեծ մասը եղել են նաեւ Հայաստանում, եւ գիտեն, թե այստեղ ինչեր կան: Հենց դրա համար էլ Առեւտրի տունը կբացվի այդ կղզում: «Հայկական մթերքը չինացիներին առաջին հերթին գրավում է իր էկո լինելով, դա առաջնայինն է: Հիմնականում խոսքը հանքային ջրերի, ալկոհոլային ու ոչ ալկոհոլային խմիչքների, հյութերի ու պահածոների մասին է: Ինչպես նաեւ նախատեսում են ամբողջական ծառայություններ մատուցել: Հայկական խոհանոց չկա, բայց շնորհիվ Հայաստան ժամանած չինական պատվիրակության անդամների, որոնք դեռ այստեղ 5 օր կմնան, նաեւ այդ հարցը երեւի կարգավորվի: Մենք ամեն օր նրանց  զարմացնում ենք հայկական խոհանոցով,  եւ անընդհատ նրանք  աչքերը զարմանքից լայն  բացում են, քանի որ չեն պատկերացնում, թե ինչպես է հնարավոր սովորական  մթերքից պատրաստել այնպիսի ուտեստ, որ համից չկշտանան, մատներն ել հետն ուտեն»,-ասաց «Հայ-չինական հարաբերությունների տարածաշրջանային զարգացման հիմնադրամի» գործադիր տնօրեն Վլադիմիր Սիմոնյանցը:«Իրենք քննարկում են ունեցել Հայաստանի ֆինանսական  ղեկավարների հետ, եվ կարծես թե եկել են համաձայնության մեր երկրից դուրս հանվող ապրանքների Չինաստանում ներկայացվածության պարագայում ԱԱՀ-ից այնտեղ ազատվելու մասով: Սա բավականին գրավիչ է դարձնում մեր որակյալ էկոլոգիապես սննդային մթերքները: Թե ի՞նչ կարտահանվի, կորոշվի քննարկման արդյունքում: Կստեղծվի հանձնախումբ, իրենք կներկայացնեն ինչն է հետաքրքրում, գիտենք, որ չրի կարիք կա, ոչ թե հյութեր պատրաստելու համար, այլ թեյ, ինչպես նաեւ որոշ բույսերի ու դեղաբույսերի պահանջարկ կա»,-ասաց Շիրակի մարզպետ Տիգրան Պետրոսյանը:Գյումրի այցելած չինական պատվիրակության հիմնական հետաքրքրությունը միայն այս ծրագիրը չէ: Չինական կողմը հիմնականում լուրջ շահագրգռվածություն ունի բազալտի եւ բազալտի թելերի արտադրության հետ կապված: Շիրակի մարզի տարբեր հանքերում են եղել, նաեւ Լոռին ունի բազալտի լավ հանքեր: Կուսումնասիրեն, կհասկանան, ինչպես են համագործակցելու: «Մեր ներդրողները Հայաստան եկան հիմնականում բազալտի արտադրությամբ լուրջ հետաքրքրվելու համար, սակայն այս օրերի ընթացքում իրենց համար պարզեցին, որ Հայաստանի ներուժն ավելին էր, քան զուտ բազալտի արտադրությունը»:

 

Հնարավո՞ր է արդյոք չինական կողմը նաեւ բնակարանային շինարարություն նախաձեռնի: Սիմոնյանցն ասաց՝ չի բացառվում: «Մենք Գյումրիում շրջելու ենք, մի քանի շինություններ ենք ուսումնասիրելու, որպեսի մեր գործընկերները հասկանան, թե որտեղ կարող են այդ բազալտն օգտագործել: Մենք արդեն Շիրակի մարզպետի կողմից մի տարածքի առաջարկ ենք ստացել Գյումրիում, դա արդեն ավարտուն շինություն է, որը կարող ենք օգտագործել կամ որպես տեխնոպարկ, կամ որպես Չինական ավանդական բժշկության կենտրոն»:

 

Ինչու՞ է համագործակցության սլաքն ուղղվել դեպի Շիրակի մարզ եւ Գյումրի: Հստակեցվեց. կարեւոր դերակատարությունն  այդ ընտրության մեջ բաժին է հասնում  «Շիրակ» օդանավակայանին: Երկրորդ տեղում է նոր բացվելիք մաքսատան առկայությունը: Չի բացառվում, որ մոտ ապագայում հենց Գյումրիի «Շիրակ» օդանավակայանից հնարավոր լինի Չինաստան թռչել: Չինական 3 ավիաընկերությունների հետ արդեն քննարկումներ են սկսվել Հայաստան-Չինաստան ավիափոխադրումների իրականացման համար: «Հիմա քննարկվում է, թե որ օդանավակայանը կլինի առավել հարմարավետ չինական ավիաընկերությունների համար՝ հաշվի առնելով այն հանգամանքը, որ ավիափոխադրումը բավականին երկարատեւ է: Այս առումով ավիաընկերություններն ունեն հատուկ պահանջներ, որոնք բավարարել է պետք: Մենք նաեւ դիտարկում են Գյումրու օդանավակայանը, քանի որ մոտ ապագայում ամուր կապեր ենք ունենալու այս քաղաքի հետ: Եթե Գյումրին համապատասխանի այդ պահանջներին, ինչպես նաեւ բավարարի չինական կողմի տեխնիկական պահանջները, այն մեր համար կլինի համար առաջին օդանավակայանը»,-ՀԺ-ի հետ զրույցում ասաց «Հայ-չինական հարաբերությունների տարածաշրջանային զարգացման հիմնադրամի» գործադիր տնօրեն Վլադիմիր Սիմոնյանցը:

 

Առաջիկայում Չինաստան կմեկնի Շիրակի մարզպետը, որպեսզի հենց տեղում առավել առարկայական  քննարկեն համագործակցության հնարավոր տարբերակները:

 

http://www.armtimes.com/hy/article/170363